Matthew 18
Ma koai dela e kaedahi e aamua?
(Mark 9.33-37; Luke 9.46-48)
1Di madagoaa deelaa, gei ana dama agoago ne mmaanege adu gi Jesus, ga heeu, “Ma koai dela e kaedahi e aamua i Tenua o God di Langi?” a 2Jesus ne gahi mai tamagiigi dulii ga haga duu i mua digaula, 3ga helekai boloo, “Au e hagi adu di tonu bolo maa goodou hagalee huli gi hai be nia dama lligi, goodou e deemee di ulu i Tenua o God di Langi. b 4Tangada dela e kaedahi e aamua i Tenua o God di Langi la go tangada dela e dugu ia laa lala gi hai be tama deenei.” 5Gei tangada dela ga benebene di tama dulii beenei i dogu ingoo, geia ne benebene hua au.Nia hagamada ang gi di huaidu
(Mark 9.42-48; Luke 17.1,2)
6“Tangada dela ma ga hagahuaidu tama e dahi i nia dama lligi beenei dela e hagadonu au, gi doo a mee gi lodo di huaidu, e humalia hua e lawalawa dono ua ginai di hadu damanaiee ga haga bubulu gi lodo di moana. 7E huaidu ang gi henuailala, nia mee i golo ala e hai nia daangada gi kili gi daha nadau hagadonu! Nia mee aanei ala koia e hai, gei e huaidu huoloo ang gi tangada dela e kila aga nia mee aanei i dono baahi. 8Maa doo lima, be go doo wae, ga hai goe gi doo gi lodo di huaidu, duudia gi daha mo goe. Maa goe ga ulu gi lodo di mouli dee odi mo doo lima be doo wae e dahi, koia e humalia i di goe ma ga hudu gi lodo di ahi dee odi mo oo lima mo oo wae dogomaalia. c 9Maa doo golomada ga hai goe gi huaidu, kabe ina gi daha. Maa goe e ulu i di mouli dee odi mo doo golomada e dahi, koia e humalia i doo hudu gi lodo di ahi dee odi mo oo golomada e lua. dDi ala kai o siibi ne ngala
(Luke 15.3-7)
10“Goodou hudee haga balumee ina tangada e dahi i digau ala e lligi beenei, gei gi iloo bolo nadau gau di langi e noho i baahi dogu Damana dela i di langi. 11[Idimaa, Tama Tangada ne hanimoi belee haga mouli digau ala gu nngala.] e 12Goodou e hagamaanadu bolo aha: Taane ana siibi e lau gei e dahi gu ngala, mee ga hai dana aha? Mee ga dugu nia siibi e matiwa maa hiwa gi geina nadau geinga i hongo di gonduu, ga hana ga halahala dana siibi dela ne ngala. 13Au e hagi adu gi goodou di tonu bolo di madagoaa mee ga gidee di maa, dono tene gi siibi deenei koia e damana i dono tene ang gi nia siibi e matiwa maa hiwa ala digi nngala. 14E hai gadoo be di godou Damana i di langi e de hiihai gi tangada e dahi i digau ala e lligi gi ngala.Tuaahina dela ne hai dana huaidu
15“Maa doo duaahina gu hai dana mee huaidu adu gi di goe, hana gi baahi o mee, hagi anga ina dana mee huaidu dela ne hai, malaa heia mada goolua. Maa mee gu baba adu gi di goe, goe ne haga heaga a mee. f 16Maa mee hagalee hagalongo adu gi di goe, lahia dau dangada e dahi be dogolua madalia goe, gi hai be nia helekai di Beebaa Dabu e hai boloo: Nia daangada dogolua be dogodolu e hai ai nia haga modongoohia nia mee huogodoo. g 17Maa mee hagalee hagalongo gi digaula, hagi anga ina gi di nohongo dabu. Maa mee hagalee hagalongo gi di nohongo dabu, dugu ina hua a mee be tangada tuadimee be tangada hagabudu dagitedi.Di bule mo di huge
18“Au e hagi adu gi goodou di tonu bolo godou mee huogodoo ala ma ga tai i henuailala le e tai labelaa i di langi, godou mee huogodoo ala ma ga huge i henuailala, le e huge labelaa i di langi. h 19Gei au e hagi adu labelaa gi goodou bolo ma dogolua ga buni i dahi mee i di nau dalodalo i henuailala, gei dogu Damana i di langi e dugu anga di nau mee dela e tangi ai. 20Idimaa, di madagoaa dela e buni ai nia daangada dogolua be dogodolu i dogu ingoo, gei au e madalia digaula.”Di ala kai tangada hai hegau hagalee dumaalia
21Peter ga menege mai gi baahi o Jesus ga heeu, “Meenei Tagi, nia holongo e hia e dumaalia iei au gi dogu duaahina ma ga hai hala mai gi di au? Nia holongo e hidu?” i 22Gei Jesus ga helekai, “Deeai, nia holongo e hidu haga lagolago gi di madahidu. j 23Idimaa, Tenua o God di Langi le e hai gadoo be di king dela ne maanadu bolo ia ga haga dina nia boibana ana gau hai hegau. 24Mee ga daamada dana hagadina deenei, gei tangada e dahi ga dagi mai gi ono mua, tangada e boibana gi mee nia bahihadu silber e madangaholu mana(10,000). 25Tangada deenei hagalee ana bahihadu e dohu di hui dono boibana ai, gei di king ga helekai bolo mee e hui gi daha gadoo be di hege mo dono lodo mo ana dama, mo ana mee huogodoo ala e hai mee ginai, e hui ai dono boibana. 26Tangada hai hegau deelaa ga dogoduli ia i mua o mee, ga helekai: Meenei, goe manawa dumaalia mai gi di au, au ga hui laa dogu boibana. 27Di king deelaa la gu aloho, gu dumaalia gi mee i dono boibana, ga hagau a mee gi hana. 28Gei taane deelaa ga hagatanga, ga hana ga heetugi gi dono ehoo hai hegau dela ne boibana gi deia ana bahihadu silber e lau, gei mee ga kumi a mee ga llomi dono akii, ga helekai: Huia doo boibana! 29Di hoo hai hegau o maa ga dogoduli ia gi mua o mee ga dangidangi gi mee: Meenei, goe gi manawa dumaalia mai gi di au, au ga hui laa di maa adu gi di goe. 30Gei mee digi hagalongo, ga lahi a mee, ga hudu gi lodo di hale galabudi, ga galabudi ga dae loo gi di madagoaa ma ga hui dono boibana. 31Gei nia hoo hai hegau o maa ala i golo ga mmada gi di mee dela gu hai, gu lodo huaidu huoloo, ga hula, ga hagi ang gi di king nia mee huogodoo ne hai. 32Gei di king ga gahi mai dana dangada hai hegau deelaa, ga helekai gi mee: Goe tangada hai hegau huaidu, idimaa, au gu dumaalia adu gi di goe doo boibana hagatau, i doo dangi mai gi di au. 33Gei goe e aha dela digi dumaalia ang gi doo ehoo hai hegau, be au dela ne dumaalia adu gi di goe? 34Di king deelaa gu hagawelewele huoloo, ga hudu a mee gi lodo di hale galabudi, e hagaduadua ga dae loo gi di madagoaa ma ga hui dono boibana hagatau.” 35Gei Jesus ga helekai, “Dela gadoo di hai o dogu Damana i di langi ga hai adu gi goodou, tangada nei mo tangada nei, maa goodou ga hagalee dumaalia ang gi di godou duaahina aga i lodo godou manawa.”
Copyright information for
KPG